La duavos de interlinguistica: Descartes e Leibniz

Interlinguistica per esperantistes
(numero 5 de 10 articles)
Fonte: Federico Gobbo, revista Esperanto, desembre 2014

La idea de un lingua internasional aidante ave se orijin en la sentenio 17, cuando un manera nova de pensa ia flori pos la revolui copernican e siensistes ia comensa scrive en linguas nasional en loca de latina. Filosofistes brites como John Wilkins, George Dalgarno, e Francis Lodwick ia proposa linguas apriori como metodos de clasi sabes e representa consetas vera.

La data batizal de interlinguistica es 20 novembre 1629, cuando René Descartes ia envia un responde a un letera en cual Marin Mersenne, un otra filosofiste, ia solisita se opina sur esta linguas. Diseda par Descartes, la lingua perfeta es fasil per scrive e pronunsia, ave un gramatica coerente e clar, e ave un vocabulo de radises atomin; la linguas filosofial es tro difisil. El ia crede ce on pote crea esta lingua e descovre se siensa (interlinguistica) – ma ance ce esta no va aveni real. La autor sujesta ce esperanto es un tal lingua.

Descartes ia crede ce la mundo es ontolojial divideda en un parte material e spasial cual on pote comprende con matematica, e un parte pensante cual es la esense umana. A acel tempo, la funsiona de la serebro ia es nonconoseda, ma Descartes no ia acorda ce la mente es situada en la cor. El ia ipotese ce la corpo e la mente interata en la glande pineal, e ia move de Frans a Nederland pos esta eresia.

Leibniz ia nase en 1646, cuando Descartes ia ave ja 50 anios. El ia viaja a Paris e London per aprende ideas nova, e ia deveni controversa entre siensistes brites cuando el ia publici la teoria de calculo cual ance Newton ia descovre. En Frans, la Academia de Siensas ia rejeta el car el no es franses. El ia scrive multe sur filosofia e siensa, incluinte La Monadolojia, cual Émile Boirac ia tradui a esperanto en 1902.

En 1671, Leibniz ia descovre la lingua Carater Real par Wilkins, en cual sinias scriveda coresponde esata a ideas vera. Ma per Leibniz, la cualia importante no ia es la consetas ma la regulas per razona sur los. El ia imajina un lingua perfeta como un colie de tal regulas, cual el ia nomi un characteristica universalis. (Esta ia es la comensa de la lojica moderna.)

El ia prefere la usa de latina per libros, e ia crea un varia simplida de latina nomida lingua generalis, cual el ia publici nunca, ma de cual Louis Couturat ia descovre fratos en la temprana de la sentenio 20.