La frates de Saussure e esperanto

Interlinguistica per esperantistes
(numero 4 de 10 articles)
Fonte: Federico Gobbo, revista Esperanto, novembre 2014

La familia de Saussure ia produi multe persones importante, incluinte la frates Ferdinand (1857–1913, la padre de linguistica moderna) e René (1868–1943, un matematiciste e la esperantolojiste prima).

René ia deveni esperantiste pos visita la congresa mundal du en Geneve en 1906 – la mesma loca e anio como la presenta prima de un curso de linguistica jeneral par Ferdinand. Alga reportas dise ce René ia visita acaso; otras dise ce Ferdinand ia envia el como oservor.

On no sabe esce Ferdinand ia studia profonda esperanto, ma en la libro de la curso (1916), on leje ce “la lege de cambia lingual … aplica an en la caso de linguas artifisial”, e esperanto es ofreda como esemplo. Esperanto esempli ance la idea ce un lingua es un ecuilibra entre la comunia interna e la comersia esterna: lo ia survive car se comunia ia es forte, e reformis no ia susede sin crea un comunia nova e separada.

René ia furni (per lua) la ofisia prima de Universala Esperanto-Asocio en 1908, e ia coedita la revista Internacia Scienca Revuo. En 1907, el ia proposa la spesmilo, un unia de mone global. El ia publici libretas en 1910 e 1915 per defende esperanto contra la atacas morfolojial de Louis Couturat.

La obra de 1915 inclui un teoria sur la crea de parolas, seguente cual la radis pom sinifia vera pom(frukt)(aĵ)(o) [e donce conteni un carater sustantival]. El ia introdui un sistem de predise la sinifia de parolas composada, usante prinsipes de nesesa e sufisi. En la curso de Ferdinand on leje ance sur la libria de crea parolas en esperanto, donce probable el ia conose la teoria de se frate.

René ia atenta resintese ido e esperanto, e cisa per esta razona la Academia de Esperanto no ia ofisiali se teoria asta 1967, an si Zamenhof mesma ia loda lo. El ia abandona esperanto en 1925 e ia partisipa en la laboras temprana de IALA per sintese interlinguas diversa.

La libro de la curso de Ferdinand, par cual se nom ia deveni famosa, ia es compilada pos se mori par esamina la notas de se studiantes. Lo presenta ideas astrata, sin datos fisical o analises sistemosa. Lo dise ce linguistica debe descrive la istoria strutural e sosial de tota linguas, esplora la fortes cual anima e restrinje linguas, e defini se teoria propre. Lo es un obra temprana e influosa de struturalisme.