La maneja de linguas (“language planning” en engles) es un ramo de sosiolinguistica cual ia nase direta pos la Gera Mundal Du. Alga de se abrivias ia es espertas sur linguas minor, per esemplo Heinz Kloss sur minorias germanica e Joshua Fishman sur ides; otras, como Einar Haugen e Valter Tauli, ia es spesialistes sur la situa de la linguas nordica. Tauli ia es la linguiste prima ci ia indica ce linguas desiniada es casos estrema de linguas manejada.
Cuando on maneja un lingua, on atenta revive, salva, o promove lo. Si la sola usa de un lingua es privata en familias, esta sujesta ce la lingua es morinte; Fishman ia recomenda estende un tal lingua a nomi alga stradas e plazas. On atenta trova un ecuilibra entre la lingua dominante (A) e la linguas minor ambiente (B), e esta esije un conose profonda de la situa political.
Kloss ia introdui la idea de un lingua distante [Abstandsprache]: per esemplo, en Cimri, engles (A) e cimrica (B) es strutural tan distante ce los no risca disturba la un la otra; ma dansce, norsce, e svensce es multe simil. On maneja linguas simil par ajunta diferes, per esemplo de spele o de vocabulo nova, produinte un lingua developada [Ausbausprache]. La diferes dona un senti de securia a cada lingua. Min comun, on uni du linguas, como albanian norde e sude pos la Gera Mundal Du.
On pote maneja la prestijia de un lingua. Esta relata a se usa en situas ofisial, como sur biletas de mone. (Per esta razona, la sola parola sur biletas european es “euro” – en tre alfabetas.) Un lingua pote es ofisial reconoseda sola per proibi se usa, o pote es ofisial en sola alga partes de un pais. On pote alti la prestijia de un lingua par estende se ofisialia, par usa lo en situas siensal o academial, o par populari musica o difusas en la lingua.
On pote maneja ance la corpo de un lingua: no sola se vocabulo, ma ance se sistem de scrive. Per esemplo, la sona de la sinia “ñ” de espaniol (A) es scriveda “ny” en catalan (B), per crea un distantia. Comunias cambia se alfabeta sola a momentos political forte, como cuando turces ia adota la alfabeta roman a la formi de la Republica de Turcia.
A veses, on normi la corpo de un lingua cual ave multe varias local. En la istoria de italian, on ia favore simple la varia de Firenze par causa de se leteratur; ma en Sardinia on ia ofisiali en 2006 un misca de dialetos diversa. On moderni ance comun la corpo de un lingua vea, ajuntante parolas nova afin lo conveni per discute la mundo de oji.
En developa un lingua, on debe minimi la distantia interna entre la linguas B, e masimi la distantia esterna entre estas e la lingua A. Per esemplo, piemontese (B) ave du maneras de dise “computador”: ordinator (simil a franses) e elaborator (simil a italian, la lingua A), e la autor recomenda la prima.