Retaj entreprenoj forprenas kongresajn enspezojn

La kunsidon partoprenis oficistoj de la Centra Oficejo de UEA: Osmo Buller, Pasquale Zapelli, Stanka Starčević, Roy McCoy, Clay Magalhães kaj Tobiasz Kaźmierski. Krome en la salono estis ankaŭ Stano Marček, kiu iom poste mem gvidis la kunsidon de legantoj de la revuo Esperanto. Krome la kongreson ĉeestas ankaŭ Ionel Oneţ, kiu tamen laboris en libroservo kiun sekve ne necesis fermi por tiu horo. La kvanto da helpantoj kaj deĵorantoj estas iom mankohava en la ĉi-jara kongreso.

La ĝenerala direktoro de UEA, Osmo Buller, informis, ke ne okazis ŝanĝoj en la personaro de la Oficejo post Hanoja kongreso, sed ke ŝanĝoj aperos, venontjare ĉar jam aŭtune Roy McCoy pensiiĝos. La asocio laŭ Osmo Buller ne havas financan eblon dungi anstataŭanton por Roy McCoy, sed necesas dividi liajn taskojn inter la nunaj oficistoj.

La publiko eksciis pri sekvoj de la ĉiam pli grava rolo de interreto, kiuj jam portis pliajn ŝarĝojn al organizantoj de Esperanto-kongresoj. Iam UEA funkciis kiel peranto de flugoj, kaj ricevis el tio makleraĵon de 8 procentoj. Tio ne plu ekzistas, kaj nuntempe la bazaj prezoj de flugoj ĝenerale estas tute teoriaj, kiel atentigis Brian Moon. Tiel la reklamo de Star-alianco en dua bulteno kaj kongresa libro estas simple reklamo, por kiu la kompanio pagas, kaj al kiu oni rilatu same dubeme kiel al ajna reklamo.

La samo rilatas ankaŭ al perado de hoteloj kaj ekskursoj. Povas esti, ke iam venos tempo, kiam UEA ne plu povos peri hotelĉambrojn, aŭ almenaŭ ke tio ne plu estos ekonomie defendebla. Jam nun montriĝas, ke la hotelo plej proksime al la kongresejo, Arnahvoll, ne estas inter tiuj kiujn peris UEA, kvankam en tiu hotelo loĝas eĉ kelkaj oficistoj de UEA.

Temas pri tio ke grandaj retaj kompanioj blokis ĉiujn hotelĉambrojn en tiu hotelo (kaj ofte faras la samon por hoteloj apud kongresejoj) kaj pagas al hotelo por ke nur ili rajtu peri tiujn hotelojn. Se UEA mendus ĉambrojn en tiuj hoteloj, ĝi devus pagi multe pli ol kongresanoj pagas, se ili rezervas rekte ĉe la retaj firmaoj. La samo povus iam okazi eĉ por ekskursoj, kaj tiam necesus altigi kongresan kotizon, ĉar enpezoj el perado de hoteloj kaj ekskursoj forfalus.

Tamen, almenaŭ en iuj el la hoteloj, kiujn oni povis rezervi tra UEA, la prezoj evidente restis konkurpovaj por la kongresanoj, samtempe portante al la asocio profiteton. Kiel atentigis unu kongresano, ŝia mendo de unu ekstra nokto en sama hotelo kostis 100 eŭrojn pli ol po-nokta mendo pere de UEA dum la kongresa semjano.

Aliaj demandoj kaj komentoj de la publiko temis plöejparte ankaŭ pri kongresoj kaj publikaĵoj de UEA, unuavice pri Jarlibro. Komentantoj volis ke nomo de delegito aperu en emfazitaj literoj en jarlibro, ke estu ankaŭ persona nomo aŭ almenaŭ unua litero de la persona nomo en laŭlanda listo de kongresanoj en kongresa libro. Tiel, se iu konmgresano konas iun Martin el Germanio, sed ne scias familian nomon, ne necesus serĉi tra ĉiuj kongresanoj de Germanio, sed oni pli facile trovus tiun kiun oni serĉas.

Inter proponoj al kiuj CO-anoj rilatis pozitive estis ankaŭ tio, ke en la kongresa libro est mapo de kongresurbo kun indikoj pri kongresejo kaj hoteloj mendeblaj pere de UEA sur la mapo. Krome io kio jam estas decidita estas ke estonte estos ne laŭminutaj sed laŭmetraj aŭ kilometraj distancoj inter la kongresejo kaj hoteloj en la kongresa libro.

Eventuale en libroservo eblos dum la lastaj tagoj de la kongreso pagi per eŭroj, kaj ne nur per islandaj kronoj. Plej strangas ke ne eblas pagoj en eŭroj, kvankam la prezoj sur libroj estas indikitaj en eŭroj kaj ne en loka valuto.

Krome aperis kritiko, ke por la kongresa balo necesus vera orkestro kaj viva muziko, ne nur diskejo, kia ĝi estis pasintjare kaj ĉi-jare. Pro manko de plendoj pri seriozaj problemoj, la sugestoj kaj proponoj de kongresanoj havis bonan reeĥon inter la oficistoj, kaj eventuale iuj ŝanĝoj, ekzemple en sendado de konfirmoj pri mendoj por UK, realiĝos dum la venonta jaro.
Raportis Jukka Pietiläinen