Eskapism e prokrastinacia

Rosto:

Olim sat aktiva che l’ interlinguistik socie, per internet, yo nun prefera no expozar me, eskapar aktivitate koncernu auxiliara linguas. Ki save me, ol save, ke yo vive in Rusia, e ipsa es rusa. Dum lasta yare, e in nuna tempe mei lande experienta certena desfacilitate in externa politika. Isto no aga kom reala problemes por nosi popule, yen ke, in Ukraina on have reala problemes. Noi hike in plu parte forsan pova plendar pri morala problemes, if ali-ki in tote senti lo tale. De altra flanke, on no pova dir, ke problemes es tote illuzora, pro ke lo existe tal reala kozes, konosata kom oxidentala sankcies kontre Rusia, e anke Rusia faceva certena pases kel es perceptata kom aneksia e agresia. Yo konscia, ke de hike, de interne, e de externe kozes aspekta diferente. Por komprener me on bezona viver hike, e yo no espera eser kapabla explikar ali-ko. Ergo, diskutar pri tal temas yo no have dezire.

Per se, interlinguistes inklina eser anarkistes e kosmopolites. Tamen, pura idea es un koze, e in realitate lo es desfacila pretender ke nul-ko speciala eveni. Antropes che l’ grupe Posta Mundi, ube yo es un membre, certe nun pensa, ke yo es un non-serioza persona, tala, kel promesa e no face, e kel ache abandonava li tota afere. Ma li koze es, ke yo no save, ko facer. Yo funkcionis kom chef-redaktor del jurnal “Posta Mundi”, ma nun yo ja no senti me eser neutrala persona por kontinuar. Diversa parlo kontre Rusia es nun perceptata da me kun dolor. Yo save, ke che interlinguistik socie antropes ili omna es bona. Ma li globala negativa etoso prema.

Frekuente yo nun pensa, ke morgim kozes devenira altra, e omno esera plu facila per se ipsa. Plu bona es simple vartar. Ma morge veni e deskovra se eser li sama hodie kuala hiere, ve. Prokrastinacia, tala tu es. Politik situacione es hodiala, e interlinguistika es eterna, do forsan hibernar self til altra epoke? – E trovar self stranjera ibe, a-ha.