2014 Luxemburglando

ASKOLTEZ SONA ENREJISTRURO

En marto 2014, Luxemburglando prezidis la Konsilantaro di Sekureso di la Nacioni Unionita. Luxemburglando esas grand-dukio west-Europana, regnata da Ilua Alteso Rejal Henrikus, per la Graco di Deo Grand-Dukulo di Luxemburglando, Dukulo di Nasovia, Palatenulo di Rhenlando, Komtulo di Sena, Lapis Regius, Kattimelibokum e Decia, Burgravulo di Hammerstein, Siniorulo di Mahlberg, Wisbada, Idstena, Merenberg, Limburgum ed Eppstein.

Luxemburglando jacas sur voyo importanta E25 de Nederlando trans Luxemburglando e Strasbourg (olim Straßburg) a Palermo. Segun Facebook, Portugalani, Belgiani, Franciani e Germaniani esas la maxim bona amiki di Luxemburglandani. Belgia, Germania e Francia esas la maxim granda parteneri komercal di Luxemburglando. Segun l’ Inquesto Mondal di Valori, Belgiani e Britaniani esas mentale proxima a Luxemburglandani. En la Nacioni Unionita Luxemburglando ofte votas kun Italia, Japonia, Montenegro e Slovenia.

  • 2014-03-24 | 2 456 741 | LU     | La Komisitaro Europana aprobis nova reguli luktonta kontre sekreteso bankal, qui obligas omna duadekeok membri dil Uniono Europana komunigar informi pri interesta pagi, por ke li povez propre taxar sua civitani. La propozo dum multa yari opozesabis da Luxemburglando ed Austria pro timi, ke olia sistemi bankal konkurencale des-avantajizesus komparate kun impostal paradizi quale Suisia. Ma ed Austria e Luxemburglando konsentis al nova reguli dum kongreso en Bruxelles, recevinte certigi del Komisitaro Europana, ke Suisia ed altra impostal paradizi nun esas sur la sama pagino, kande on inter-kambias informi pri la quanto de interesto pagata a posedanti di konti. “Me savas, ke co esas enorme nacionale signifikanta por li e me joyas, ke li nun esas ri-certigita, ke lia interesti protektesas e respektesas,” dicis Algirdas Šemeta, la komisitulo dil Uniono Europana pri taxado, pri la des-quieteso Austriana e Luxemburglandana.
  • 2014-03-26 | 2 456 743 | BE-BRU | Alarmo sekuresal deklaresis pro pako suspektinda trovita en autobuso en la nordo di Bruxelles ye cirkum tri kilometri de la sideyo di NATO dum vizito da prezidantulo Usana Barack Obama. Polico Belgiana invitis la piroteknisti por inquestar la pako. Omno rezultis en alarmo falsa. La pako panikiva des-kovresis esar sen-danjera e la perimetro sekuresal cirkum l’ autobuso des-establisesis. Obama pose negociis kun sekretariulo general di NATO Anders Fogh Rasmussen.
  • 2014-03-31 | 2 456 748 | FR     | En elekti municipal en Francia, kandidati di la dextristara Uniono por Movado Populal standis bone. La Partiso Socialistara guvernanta generale standis male, ma olia kandidatino Anne Hidalgo esis sucesoza, divenonte l’ unesma urbestrino di Paris. La Franciana guvernerio agnoskis granda perdo. La prezidantulo Franciana François Hollande nominis Manuel Valls, antee ministrulo di internaji, kom la nova chef-ministrulo, remplasanta Jean-Marc Ayrault.