Duo robatores

Duo robatores fugiente ante le policia un die arrivava in un grande citate

ubi illos nunquam habeva essite. Lor auto se rumpeva justo ante que illes

attingeva le limite del urbe, dunque illos vadeva a pede al centro. Le un

esseva blonde, le altere brunette. Ambes esseva vestite in jeans e nigre

jachettas de corio, cata un con un pistola in le tasca interne.


Illos planava robar un banca e postea fugir del pais con adjuta de identitates

falsificate pro passar le resto de su vitas in luxo a un insula caribe. Illos jam

habeva obtenite le passaportos falsificate. Ma, como nos tosto videra, lor

plano esseva imperfecte.


Post alcun tempore illos videva un banca: “Banca del Sud”. Illos reguardava

al interior trans un grande fenestra. Nulle clientes esseva visibile. Un cassera

sedeva detra le banco. Illos spectava le un al altere e nutava. Postea illos

poneva pantys a su capites, le quales esseva transparente ma celava lor

physionomias, e curreva a in le banca con armas levate:


“Isto es un robamento! Manos in alto!” le blonde robator critava.

Le cassera reageva e con timor e con surprisa. Illa levava su tremente manos.

Le viros la approchava con hasta:

“Nos da tot’ le moneta, prompt’!” clamava le viro brunette.


“N…nos…non…h…ha…moneta…” illa balbutiava terrificatemente.

“Ah, folle donna, clar’ que vos ha moneta! Nos guid’ al cassa forte!”

le viro brunette continuava.

“Nos solo offere consilio economic e simile servicios. Nos non plus manea

moneta contante.”

Le cassera habeva recuperate partialmente su continentia.

“E si alicun’ vole prender moneta de su conto?”

“Illos debe ir al cassero automatic.”

“OK, e ubi es illo?” le viro blonde diceva impatientemente.

“Nos lo habeva presso le entrata, ma illo esseva usate tanto rarmente que

finalmente illo esseva removite. Le cassero automatic le plus proxime es situate

al station ferroviari un medie kilometro via.”

Subito distante sirenas deveniva audibile. Le sonos rapidemente cresceva

in volumine. Ambe le viros succuteva e currente exiva del banca. Illos trovava

un auto in le vicinitate del entrata. Le blonde fracassava un del vitros lateral,

aperiva le porta del intro, entrava al auto e aperiva le altere porta assi que su

companion poteva entrar.

“Ignira nos le carro a filo calid’ e vamos d’aqui com’ fulmines!” ille vociferava.


Ma quando ille non videva ni le volante ni le cassa de cambios, ille deveniva

paralysate. Ante ille solo esseva un schermo con textos animate in colores forte.

Un molle, ma mechanic, voce feminin parlava ex un altoparlator:

“Benvenite al Taxi Autopilota S.A. Insere tu carta bancari in le apertura sub

le schermo e postea dice tu destination.”


“Diabolo! Es un de ille damnate taxis!” le brunette blasphemava. “Merda,

in le passat’ era plu’ facil’ ser un robator. On potev’ negotiar con ver homines,

qui comprendev’ le fort’ argument’ del pistol’!”

Illos ambes curreva ex le auto. Duo autos de policia jam esseva la.

Quatro policieros exiva de illos e se positionava detra le portas del autos

con armas levate:


“Quita vostre armas e leva le manos super vostre capites!” un de illos critava.

Le viro blonde reageva rapidissime. Ille celeremente hastava a un passante

femina, sasiva su collo e poneva le pistola contra su capite:

“Dispare vos d’aqui, policieros, o yo tirara le capite d’iste donna in pecias!”

Le donna respondeva a un voce basse e molle:

“Io es le androide de menage LY2314. Si tu damnifica me, tu debe reimbursar

mi proprietario con un unitate equivalente.”


“Diabolo! Ancor’ un de ille pupas! Illos son ubique iste dies!”

In desperation ille tirava contra un del policieros. Le balla colpava su capite.

Illo ricochetava creante un sono metallic. Le policiero androide diceva a

un alte voce autoritari:

“Tu ha usate fortia violente contra un functionario statal. Tu es un unitate

defective. Tu essera reprogrammate a un unitate de servicio del tertie rango.


Le policiero esturdiva le blonde homine con un radio laser de su arma,

e ille cadeva al solo. Ora le homine brunette jectava su pistola al strata

e gemeva anxiosemente:

“Io capitula! Lassa me devenir un unitate de servicio del secunde rango,

ma io demanda vos: non me reprogramma!!!”