Burcas e nicabes es proibida en Danmarc

Danmarc ia legi un proibi contra velos de fas intera. Alga otra paises de la Uni European ia fa ja un lege simil, cual afeta xef femes muslim ci porta un nicab o burca.

La lege dansce ia es asetada par 75 votas contra 30 en la parlamento ier, e va deveni obligante a 1 agosto. Los ci iniora la proibi va debe paia 1000 kroner ($157). La multas per ofendores repetente va es desuple plu alta.

La linguaje de la lege nova no spesifa femes muslim, ma dise ce “cualcun ci porta un veste cual asconde la fas en publica va es punida par multa”.

La ministro dansce de justia ia dise: “En termas de valua, me vide un discute de cual spesie de sosia nos debe ave con la radises e cultures cual nos ave, ce nos no covre nosa fas e oios, nos debe pote vide lunlotra e nos debe ance pote vide la espresas de fas de lunlotra, lo es un valua en Danmarc.”

Amestia Internasional ia descrive la vota dansce como “un viole prejudosa de la diretos de femes”. Ma en la anio pasada, la Corte European de Diretos Umana ia suporta un proibi simil en Beljia, disente ce la armonia comunial es plu importante ca la direto individua de espresa relijiosa.

Frans ia es la pais prima en Europa cual ia proibi velos de fas intera en april 2011, a sete anios pos sua introdui de un lege proibinte la porta de simboles relijiosa fasil vidable en scolas. Lo ia es segueda pos alga menses par Beljia, do on ia deslegali cualce veste cual asconde la identia de un person en locas publica.

A pos, proibis completa o partal ia es asetada en Osteraic, Balgaria e la stato Bayern en Deutxland sude. La parlamento nederlandes ia acorda un proibi en la tarda de 2016, espetante un aproba par sua salon alta.