2012-07-1/3

DE *CHINA
2012-07-01: Manifesteri plenigis la stradi di Hong Kong ye kelka hori pos ke la prezidantulo di la Republiko Populal di China Hu Jintao jurigabis Liang Zhenying kom nova chefulo exekutiva di ca regiono sud-Chinana.
DE EST-AZIA
2012-07-02: Ichirō Ozawa anuncis, ke il kun cirkum kinadek altra dietani livas la progresistara Partiso Demokrata di Japonia nun guvernanta, establisonte partiso pragmatistara “Vivo di Civitani Unesme”.
DE SUD-WEST-AZIA
2012-07-05: La korpi di du pilotisti Turkiana di aeroplano milital fusilagita da Siria en la 22ma di junio rekuperesis en la Maro Mediteranea.
DE WEST-EUROPA E KANADA
2012-07-05: L’ Ofico di Inquesti ed Analizi por la Sekureso dil Aviaco Civila Franciana publikigis sua raporto final pri la falo dil flugo de Rio de Janeiro a Paris en la mezo dil Oceano Atlantika ye tri yari antee, determinante ke serio di erori da pilotisti e ne-reaktado a problemi teknikal efektigabis la dizastro mortiginta omna 228 homi en l’ aeroplano.
DE USA
2012-07-08: Dum la nuna kanikulo, un infantino mortis lasita da sua sorgero neglijema en vehilo di temperaturo interna cirkum 50 °C ed altra infantino mal-standigesis tale en Indiana, nord-USA.
DE AMERIKA LATINA ED OCEANIA
2012-07-09: Batalio pafilal ocidis sep trupachani drogal e quar policisti defensanta su en Choix, Sinaloa, west-*Mexiko.
DE SUD-EUROPA ED AFRIKA
2012-07-10: Olima guvernisto milital Kinshasa-Kongolandana Thomas Lubanga kondamnesis ad enkarcerigeso duranta dekequar yari da la Korto Punisal Internaciona en Den Haag pro rekrutir ed uzir pueruli kom soldati ed altre kontravencir yuri homal dum la konflikto en Ituri, nord-est-Kongo, inter la yari 1999 e 2007.
DE NORD-EST-EUROPA E CENTRAL AZIA
2012-07-10: La Wikipedia Rusa esis vakua dum 24 hori, protestante kontre lego Rusiana kreunta listo nigra unigita di omna ret-situi kun kontenajo interdiktita.