Simboles de Bliss ia es inventada par Charles K Bliss en la desenio de 1940, como un lingua aidante internasional, vidal, ideografial, e sin pronunsia. Los no ia susede, ma en la desenio de 1970, un ospital en Toronto ia descovre ce los permete bon la comunica par enfantes serebral paraliseda. Tal enfantes, ci pote comprende la parla de otras ma no pote parla mesma, es capas de indica simboles sur un carta.

La organiza BCI ia developa la vocabulo, cual ave aora sirca 4900 lexemes fundal. On combina los per formi parolas nova: “Alisia” es traduida como “nometa simbolin + xica + desira + comprende” (= Xica Curiosa).

La vocabulo ia es un problem en tradui Alisia en la pais de mervelias a Bliss: per esemplo, en capitol 7, no parolas ia esiste per “confusa”, “cortesia”, “melasa”, o “interompe”.

Un defia plu grande ia es tradui la bromas de parolas e la poesias a un lingua sin fonolojia e sin silabas. Per la bromas, Everson ia xerca simboles con similias vidal. Per la poesias, el ia iniora la scande, ma en la Coda de la mus (cual ave un forma vidal) el ia atende la longia de la simboles.