Lexicografia es un siensa, ma ance un arte en la caso de linguas desiniada, do on ave inisial no comunia per descrive. La desinior de un lingua es la lexicografiste prima e la lexicolojiste prima. Lexicolojia studia la regulas su la vocabulo, e pote es sincrona (sur la relatas entre lexemes a un momento) o diacrona (sur etimolojia). A comensa de un lingua desiniada, on crea ambos: la lingua apare con vocabulo moderna, ma on senti un presa per manteni tal lo.

En la libro prima de esperanto, Zamenhof no ia ofre definis esperanto de la parolas, ma definis o (plu comun) traduis mera en otra linguas, inisial rusce. El ia omete la finis gramatical, tal ce lexicografistes seguente ia fronti demandas difisil sur la categorias fundal de la morfemes. La disionario prima bilingual (franses) de esperanto ia es publicida par Émile Boirac en 1909, e on ia critica forte se nonesatia. La definis donada par un disionario influe la lingua mesma, car parlores regarda disionarios como autoriosa.

On ave cuatro maneras de introdui parolas nova en cualce lingua:
— emprestas nonfonetical (sin cambia de spele, pe ghetto en esperanto), tipal per nomes propre
— emprestas fonetical (softvaro de “software”)
— metafores traduida (ĉielskrapanto = rascasielo) [nomida “calques” en engles e normal “paŭsoj” en esperanto, ma la autor scrive asi “kalkeoj”]
— forjas nova (samideano, programaro)
Parlores de un lingua forte e sana (como esperanto) prefere jeneral forjas o metafores traduida.

Linguas nasional conteni alga elementos artifisial, pe bus, naseda en Paris en 1828 de la parola latina omnibus (= per tota persones).

Bruno Migliorini ia studia la lexicolojia italian e esperanto. El ia introdui la parolas autista (= motoriste) e regista (= dirijor de filma) a italian. Terminolojia es la studia de vocabulo tecnical. Migliorini ofre gas como esemplo, forjada par un cimiciste flames a comensa de la sentenio 17.