Perce tan multe linguas desiniada romanica?

Interlinguistica per esperantistes
(numero 8 de 10 articles)
Fonte: Federico Gobbo, revista Esperanto, marto 2015

Leibniz ia desira ce on no abandona scrive testos siensal en latina. La simpli la plu conoseda de latina es Latino sine Flexione (Latina sin Infleta) par Giuseppe Peano.

Latina ia es un lingua internasional tra cuasi du milenios. Lo es prima atestada en la sentenio 6 aec, cuando la sosia ia comensa comersia tra la Mediteraneo. En la sentenio 3 aec, un forma ofisial scriveda de latina ia apare, ma la forma parlada ia continua evolui entre la poplas concistada par la romanes, con la forma scriveda como model.

En 168 aec, la romanes ia concista Elas. La comedias de Terentio presenta elinicas como sofisticada – “cultivada” no con relata a la tera ma a se mesma. Tal on ia reseta la sinifia moderna de “cultur”.

Post la cade de la Impero Roman Ueste en 476, la linguas en la teritorios ueste ia maturi e gania prestijia, deveninte la linguas romanica. Ma latina mesma ia survive como la lingua ofisial de la Eglesa Catolica. Tra sentenios, persones instruida ia es membros de la Eglesa, e donce latina ia deveni la lingua de siensa.

Post la publici de volapük e esperanto, un idea frecuente ia es la revive de latina. Ma on ia fronti tre problemes: De cual spesie de latina on ta prende la sintatica? Esce on ta pronunsia la parolas como Cicero o como la Eglesa? Esce on ta permete la usa de morfemes romanica (banca per banco) e elinica (photopingere per imajes dijital) per ave un vocabulo moderna?

Alga persones (la scola naturiste) ia proposa solve esta problemes par linguas inspirada de latina, comun con cualias romanica.