La du Eliezeres: du vives, du linguas

Interlinguistica per esperantistes
(numero 7 de 10 articles)
Fonte: Federico Gobbo, revista Esperanto, febrero 2015

La nom ofisial de Zamenhof ia es Lazar Markovitx, e el ia usa la nom Ludwik en relatas con persones noniudi. [Lazar es la forma rusce de Eliezer; la forma ides es Leizer.] Tra la dui prima de la sentenio 20, esperantistes ia asconde la fato ce Zamenhof ia es iudi, preferente refere a el como “un oculiste polsce”. Zamenhof mesma ia descrive se como “un ivri de la geto”, disente ce si el no ta es ivri, el no ta ave la idea de un lingua uninte.

Zamenhof ia es un axcenazi – un parlor ivri de Europa sentral o este. El ia es ance un litvac – un ivri de Lietuva o Polsca. Alga litvaces ia es influeda par hascala, un filosofia cual ia vole seculari la iudisme: estas ia es iudis sola en se casas.

A la fini de la sentenio 19, cuando Lietuva–Polsca ia es un parte de Rusia su la tsares, du litvaces con la nom Eliezer ia nase e ia dona vive a linguas: la un ia es Zamenhof, naseda en 1859 en Białystok; la otra ia es Eliezer Yitzhak Perlman, plu bon conoseda como Ben-Yehuda, naseda en 1858 en Lujki en Bielarus.

La polsces ia atenta rebela contra la rusces en 1863, sin susede. An tal, la litvaces ia segue un idea romanticiste, soniante a un Sion nova, e ambos Eliezeres ia partisipa en esta promove, cual ia fronti tre demandas: Do la popla iudi va abita? Cual va es la rol de relijio per los? Cual lingua los va parla? Zamenhof ia xefi la demanda de lingua; Ben-Yehuda, lo de teritorio. En 1880, Zamenhof ia atenta boni la lingua ides, e Ben-Yehuda ia crea la colonias prima en Filastin.

La fio prima de Ben-Yehuda ia nase en 1882, e se jenitores ia parla a el en ivri, un lingua no usada per conversa tra 1700 anios. Ance en acel anio, Zamenhof ia suporta la fundi de un stato ivri a lado de la Rio Mississippi en la SUA, simil a la stato mormon, ma la idea ia veni tro tarda. Ja en 1884, on ia publici la jornal prima per ensenia la lingua ivri a adoltes e raporta sur la vive en Filastin.

Per evita dana la sionisme, Zamenhof ia aseta Filastin per la loca de la stato ivri, e ia comensa labora sur esperanto, en cuando Ben-Yehuda ia es ocupada sur la moderni de la lingua ivri. Pos publici esperanto, Zamenhof ia labora per crea homaranisme (orijinal nomida “hillelisme”), un filosofia moral per la mundo, de orijin ivri. Esta idealisme ia deveni “la idea interna” de esperanto.

En 1915, Zamenhof ia presenta a diplomatas la importa de fundi un Uni European e un corte internasional sur crimines de gera. El ia mori en 1917, e Ben-Yehuda en 1922, a alga semanas pos la ofisiali de ivri como la lingua de Israel. Ivri es un esemplo de maneja de linguas, ma lo no es un lingua desiniada: on ia studia lo an cuando nun ia usa lo per conversa. En se anios sioniste, Zamenhof no ia crede ce on pote revive lo.