Laŭ Mark Fettes la laboro pri la retejo malrapide progresis interalie pro problemoj en la Centra Oficejo. La decido pri renovigo estis farita en 2013. Post unu-du monatoj Fettes esperas vidi la unuan rezultojn.

Dum la Universala Kongreso en Rejkjaviko, en julio 2013, la tiam nova estraro de UEA petis kaj ricevis de la komitato la rajton uzi 100.000 eŭrojn por la prioritata tasko starigi novan retejon.

Nur post la Universala Kongreso en Lillo en 2015, du jarojn post la decido prioritati la renovigon de la retejo, la estraro de UEA komisiis al Mario Bélisle el Svisio kaj Dima Ŝevĉenko el Rusio prepari analizojn pri la tiamaj stato kaj bezonoj de UEA sur la reta kampo.

Dima Ŝevĉenko kune kun sia edzino Anna Striganova liveris 44-paĝan raporton en majo 2016, dum la raporto de Bélisle ŝajne neniam pretiĝis.

Fine en januaro 2017 jam renovigita estraro de UEA publikigis detalan alvokon pri kandidatiĝo al la tasko. En aprilo 2017 la brazila komputisto Ana Ribeiro estis elektita por gvidi la teamon kiu realigu la laboron por nova retejo kaj administra sistemo de la asocio.

Laŭ Mark Fettes, prezidanto de UEA, la prokrastiĝon de la laboro pri la nova retejo kaŭzis problemoj en la Centra Oficejo.

– Montriĝis, en la jaroj de mia prezidanteco, ke la reteja projekto estas intime ligita kun la funkciado de la Centra Oficejo. Dum Osmo estis la ĝenerala direktoro, ne eblis ŝanĝi multon en la retejo, ĉar li simple ne kredis je la neceso aŭ indeco de ŝanĝoj. Poste, dum la direktora periodo de Veronika, ni ja sukcesis ekigi pli grandskalan projekton sub la gvido de Ana Ribeiro, sed ŝi ne ricevis la bezonatan komunik-kanalon kun la oficistoj por povi adekvate kompreni iliajn bezonojn.

Osmo Buller ne konsentas pri la aserto, ke li malhelpis la renovigon de la retejo:

– Kiam Mark elektiĝis prezidanto en Rejkjaviko en 2013 kaj akceptigis en la komitato la rezervon de 100.000 euroj por la reteja renovigo, li transprenis la gvidadon de tiu renovigo en siajn manojn kaj ĉesigis la renovigon pli frue komencitan de Andrej Grigorjevskij. Mi neniel bremsis lin nek entute havis rolon en la afero. Sur la interreta kampo mi koncentris min al la flegado de aktiva ĉeesto de UEA en Facebook.

Ĉar la nova renovigo tamen ne progresis, la estraro subite ŝanĝis sian opinion kaj petis ke Andrej Grigorjevskij tamen finu sian laboron pri la retejo. La provizora nova retejo estis lanĉita en 2014 dum la novembra Malferma Tago en la Centra Oficejo. De tiam oni atendas la anaŭanoncitan grandan renovigon.

– Evidente Mark nun, kiam de lia sesjara prezidanteco restas ankoraŭ maksimume unu jaro kaj kvar monatoj kaj el lia strategia plano apenaŭ io rezultis, komencas kulpigi aliajn kaj tute aparte la direktorojn. Mi ne povas komenti tion, kiugrade li pravas pri la du jaroj post mia emeritiĝo, sed tio, kion li diras nun, aperas en tre duba lumo, se oni memoras liajn ripetajn laŭdojn pri la laboro de mia posteulino.

Komence de la jaro 2018 la taskon de ĝenerala direktoro transprenis Martin Schäffer. Dum februaro kaj marto Ana Ribeiro okupiĝas pri la renovigo de la retejo kaj la tuta administra sistemo surloke, en la Centra Oficejo, kaj laŭ Mark Fettes la laboro nun progresas bone.

– Nun la projekto antaŭeniras sur la ĝusta vojo, laŭ mia kompreno, kun bone reciproka komunikado inter la reteja teamo kaj la oficistoj. Per tio montriĝis, ke la plej kerna programista laboro rilatas al la diversaj datumbazoj uzataj de la Oficejo — precipe la adresaro, la kontoj, kaj la Libroservo. Ana jam dekomence planis pli sekuran arkitekturon de la datumbazoj, por protekti ilin kontraŭ eksteraj atakoj. Nun ŝi laboras por ekipi ilin per la necesaj administraj programoj por faciligi la rutinan laboron de la oficistoj.

La renovigo de la retejo ne temas nur pri ĝia ekstera aspekto, sed ankaŭ kaj precipe pri ĝiaj funkcioj, Mark Fettes diras:

– Unu el la ĉefaj fruktoj de tiu laboro, en la fino, estos t.n. “membrospaco” kie ĉiu membro povos ensaluti, redakti siajn personajn datumojn, kontroli la staton de sia konto, voĉdoni por Komitatanoj B kaj eventuale pri aliaj temoj, kontakti delegitojn kaj aliajn ofichavantojn, ktp. Sed ĉio ĉi dependas de la glata funkciado de la datumadministrado en la Oficejo, do tion ni devas certigi antaŭ ĉio alia.

La projekto montriĝis pli ampleksa ol oni komence kredis, sed la unuaj rezultoj baldaŭ videblos, Mark Fettes kredas.

– Mi esperas ke jam ene de unu-du monatoj oni komencos vidi kelkajn fruktojn de tiu laboro, sed necesas kompreni, ke multo ne estas videbla, ĉar temas pri la fona pretigo de laborsistemoj videblaj nur por oficistoj. La tuta daŭro de la projekto estos do pli longa ol mi komence imagis. Temas tamen pri la unua funda renovigo de niaj sistemoj de post la okdekaj jaroj. Espereble la nova arkitekturo restos solida kaj uzebla dum simile longa tempo.

Laŭ Ana Ribeiro la publike videbla parto de la nova retejo de UEA estas teknike preta jam delonge kaj jam videbla ĉe la adreso nova.uea.esperanto.net. Tie eblas vidi, ke la nova retejo de UEA estas farita per la populara enhav-administra sistemo WordPress, kiun nuntempe uzas ankaŭ Libera Folio.

Ana Ribeiro ne volas precizigi la prognozon de Mark Fettes pri la tempo, kiam la nova retejo povos esti lanĉita, sed atentigas, ke la laboro pri la administra sistemo postulas multe da tempo, kaj la nova sistemo estos enkondukita paŝon post paŝo.

– Ĉar mi valorigas la travideblecon de mia laboro, la evoluo pri kodado de nova administrejo de membroj de UEA estas komplete registrita je la retejo Github, kie ajna homo povas trarigardi, diras Ana Ribeiro.

La renovigo de la administra sistemo de UEA laŭ ŝi montriĝis pli komplika tasko ol antaŭvidite.

– La administrado de membroj de UEA estas farita delonge de iu “nigraekrana” programo kiu evoluis laŭ la tempo, kaj ĝi havas pli da esceptoj ol reguloj. Por plene enretigi la administradon de membroj de UEA, estas bezonata granda kompreno pri kiel la nuna administrado funkcias kaj kiel ĝi funkcios kiam ĝi estos plene en la reto. Mi esperas ke baldaŭ ni lanĉos unuan version de la administrilo kun ankaŭ kelkaj videblaj bonaj aferoj por membroj, kiel eblo elŝuti la revuon Esperanto en malgranda formo aŭ en MP3 por blinduloj.

Post la elekto de Aleks Kadar kiel nova ĝenerala sekretario de UEA, la elekta komisiono proponas ke aldone estu elektitaj du pliaj estraranoj: Huang Yinbao (Trezoro) kaj Orlando Raola.

La diskuto pri elekto de pliaj estraranoj de UEA komenciĝis fine de la pasinta jaro, post kiam la estraro de la asocio decidis, ke ĝenerala sekretario Martin Schäffer transprenu la postenon de la tiama ĝenerala direktoro de la asocio, Veronika Poór.

Ĉar la ĝenerala direktoro de la asocio estas oficista posteno, kiun ne eblas kombini kun laboro en la estraro, la estraro tiel perdis unu el siaj plej aktivaj anoj.

La komitato longe diskutis, ĉu entute necesas elekti novajn estraranojn, konsiderante ke tute nova estraro estos elektita jam post kelkaj monatoj, dum la Universala Kongreso en Lisbono. Iuj argumentis, ke en la nuna financa situacio de la asocio pli bonus ŝpari monon ol uzi ĝin por la vojaĝ- kaj restadkostoj de estraranoj dum kunsidoj.

Post du voĉdonoj la komitato sukcesis elekti novan ĝeneralan sekretarion, Aleks Kadar, kiu promesis prioritate okupiĝi pri la ekonomia situacio de la asocio. Nun la elekta komisiono sendis al la komitato de UEA sian proponon pri la sekvaj paŝoj.

La elekta komisiono opinias, ke kvankam ĉiuj restantaj kvin kandidatoj estas “tre ideohavaj, spertaj kaj valoraj aktivuloj kiuj povas doni tre gravan kontribuon al la estrara laboro de UEA”, neniu el ili povas sola transpreni ĉiujn nunajn taskojn en la estraro – financoj, kongresoj, kulturo, scienca kaj faka agado.

Tial la komitato laŭ la elekta komisiono devus elekti du novajn estraranojn. La du plej taŭgaj kandidatoj por la bezonataj taskoj laŭ la komisiono estas Huang Yinbao (Trezoro), kiu iĝu estrarano pri financoj, kaj Orlando Raola, kiu transprenu la ceterajn taskojn menciitajn.

Antaŭ ol voĉdoni pri konkretaj nomoj, la komitato de UEA voĉdonos pri tio, ĉu efektive estu elektitaj du pliaj estraranoj, nur unu, aŭ eĉ neniu.

La kompleta propono de la elekta komisiono legeblas ĉi tie.

En enketo farita de Richard Delamore Libera Folio montriĝis la klare plej populara retejo pri la Esperanto-movado inter la respondintoj.

Richard Delamore, vaste konata kiel la videoblogisto Evildea, faris sian nesciencan enketon afiŝante demandojn en la retservoj Reddit, Facebook kaj Twitter. Aldone li dissendis la enketon retpoŝte al siaj konatoj dise en la mondoj kaj petis ilin diskonigi ĝin.

La maniero laŭ kiu la enketo estis farita sendube influis la rezulton, diras Sten Johansson, profesia statistikisto:

– Se oni staras ekster IKEA-vendejo demandante homojn, kie ili preferas aĉeti meblojn, la rezulto ne multe valoras. Se oni demandas ekster kelkaj vendejoj, jam estas pli bone, sed tamen malfacilas difini, kiujn grupojn oni atingis kaj kiujn ne.

La demandojn respondis entute 86 personoj, kaj Richard Delamore mem atentigas, ke ilia opinio ne estas reprezenta por la tuta reta Esperantujo. Tamen li opinias ke ĝi donas ian superrigardon.

La fakto ke la enket-demandoj estis disvastigitaj tra la Esperanto-sekcio de Reddit sendube kaŭzis, ke sufiĉe multaj el la respondintoj, entute 12 personoj, menciis ĝuste la Esperanto-sekcion de Reddit inter la retejoj pri la Esperanto-movado kiujn ili ofte uzas.

Tamen rimarkindas, ke klare pli multaj respondintoj, entute 19 personoj, indikis Liberan Folion, kvankam la enketo ne estis disvastigita pere de Libera Folio.

Tiel Libera Folio laŭ la enketo montriĝis la plej populara retejo pri la Esperanto-movado inter la respondintoj, superante eĉ la ĝeneralan kategorion “retejoj de asocioj”, kiun menciis 14 el la respondintoj.

Po kvin respondintoj menciis la retejojn Lernu.net kaj Edukado.net, dum kvar menciis la retejon La Balta Ondo, ligitan al periodaĵo La Ondo de Esperanto. Respondantoj rajtis mencii pli ol unu retejon, sed 34 fakte indikis, ke ili ofte uzas neniun retejon pri la Esperanto-movado.

Aparte rimarkindas, ke evidente ne multaj el la respondintoj interesiĝas pri la retejoj de diversaj Esperanto-asocioj, se ĉiuj ekzistantaj asociaj retejoj kune kalkulitaj estas malpli vizitataj de ili ol Libera Folio. Eblas supozi, ke multaj el la respondintoj tute ne membras en ajnaj Esperanto-asocioj.

Ni demandis al Richard Delamore, kiel laŭ lia opinio retejoj de asocioj povus iĝi pli interesaj kaj utilaj por membroj kaj potencialaj membroj. Laŭ li malfacilas respondi ĝenerale, ĉar ĉiu kulturo havas malsamajn opiniojn pri tio, kio necesas por krei efikan retejon.

– La retejo, kiu plej ĝenas min, estas la retejo de UEA. Kiam mi rigardas ĝin, mi ne ekimagus, ke UEA estas ia grandskala internacia asocio. Male, la retejo donas la impreson, ke studento rapide kunmetis ĝin sen la konsilo de bona grafikisto/retfasonisto. Ĝi estas tute senviva kaj aspektas kiel Web 1.0. Jen bona ekzemplo de moderna retejo por loka branĉo de La Instutuo Konfuceo. Oni povas rapide vidi diferencon.

Libera Folio: Ĉar Libera Folio estis la plej populara primovada retejo inter la respondintoj, eble vi povus diri, kiuj laŭ vi estas la ĉefaj mankoj aŭ problemoj ĉe Libera Folio?

– Mi ne vere vidas mankojn kun Libera Folio. La lastatempa ĝisdatigo al la aspekto kaj funkciado de la retejo multe plibeligis ĝin. Antaŭe la komenta sistemo estis tute fuŝa sed nun ĝi ŝajnas bone funkcii. Mi opinias, ke la sola manko estas regula enhavo.

Manko de regula enhavo tamen kompreneble estas serioza problemo, kiu videblas ne nur ĉe Libera Folio, sed ankaŭ ekzemple ĉe la diversaj asociaj retejoj. Libera Folio kiel ĉiam bonvenigas proponojn pri atentindaj temoj kaj volonte akceptas interesajn artikolojn por publikigo.

Artikolo pri la enketo de Richard Delamore unue aperis en La Ondo de Esperanto kaj en ĝia retejo La Balta Ondo.

Per dua voĉdonado la komitato de UEA sukcesis elekti novan ĝeneralan sekretarion. Aleks Kadar anstataŭos Martin Schäffer, kiu iĝis la ĝenerala direktoro de la asocio. Li promesas aparte okupiĝi pri la problema financa situacio de la asocio.

En novembro la estraro de UEA anoncis, ke la ĝenrela direktoro de la asocio, Veronika Poór, forlasos sian postenon fine de la jaro 2017. Ŝian postenon transprenis Martin Schäffer, kiu ĝis la jarŝanĝo estis estrarano, komitatano kaj ĝenerala sekretario de UEA.

Lige kun la anoncita ŝanĝo de ĝenerala direktoro la estraro de UEA deziris, ke nova ĝenerala sekretario estu trovita ekster la nuna estraro, ĉar la ceteraj estraranoj jam estas superŝutitaj de taskoj. Pro la sama kialo la estraro proponis, ke estu alelektitaj maksmimume du pliaj estraranoj. Ambaŭ deziroj de la estraro estis akceptitaj de la komitato en reta voĉdono.

Por la posteno de ĝenerala sekretario aperis tri kandidatoj: Brunetto (Bruĉjo) Casini, Aleks Kadar kaj Orlando Raola. En la unua reta balotado neniu el ili ricevis sufiĉe da voĉoj por esti elektita. En dua balotado la komitato tial elektis inter la du kandidatoj kiuj ricevis plej multe da voĉoj: Aleks Kadar kaj Orlando Raola.

En la nova balotado Aleks Kadar ricevis 33 voĉojn, Orlando Raola 14, kaj kvar komitatanoj lasis malplenajn balotilojn.

Al la sukceso de Kadar supozeble iom kontribuis la fakto, ke lia kontraŭkandidato Orlando Raola en la komitataj diskutoj ŝajnis serioze konsideri la proponon movi la Centran Oficejon de la asocio for de Roterdamo por ŝpari monon. La komitato ne kutimas favori tiajn radikalajn ideojn kun neantaŭvideblaj rezultoj. Kadar aliflanke atentigis, ke li loĝas en Parizo, je kelkhora distanco de la Centra Oficejo, kaj facile povos vizitadi ĝin.

Tuj kiam la rezulto de la baloto iĝis konata, Libera Folio petis la novan ĝeneralan sekretarion rakonti pri siaj planoj kaj prioritatoj.

Aleks Kadar: – Kiel regula leganto de Libera Folio, mi plezure respondas viajn demandojn. Mi tre ĝojas, ke la komitato min elektis. Dankon al ĉiuj voĉdonintoj, por kiu ajn ili voĉdonis. Ili montris sian interesiĝon pri la vivo de nia asocio. Mi deziras kontribui al tio, ke UEA estu utila, efika kaj alloga. Mi celas disponigi al UEA mian laboremon, miajn movadajn kaj profesiajn spertojn kaj kapablojn, kaj mian entuziasmon. Kaj esperas bonan kunlaboron kun la ceteraj estraranoj, kun la CO kaj kun la komitato.

Libera Folio: Kiuj estos viaj unuaj paŝoj?

– Unue, estas multe por lerni: pri la taskaro de estrarano, aparte de ĝenerala sekretario, pri funkciado de la asocio, ĉu “surpapere”, laŭ la regularoj, ĉu realvive. Ni devas rapide organizi transdonon de spertoj kaj konoj kun la antaŭa ĝenerala sekretario, Martin Schäffer. Kaj mi ŝatus interkonsiliĝi kun la ceteraj estraranoj pri taskodivido kaj plej urĝaj farendaĵoj. Poste, aŭ eble samtempe, mi eklaboros pri la sekretariaj taskoj, kiuj estis listigitaj en la anonco por la posteno.

– Apartan fokuson mi havos pri la financa situacio de la asocio. Kiel anoncite, mi intencas aktive partopreni la laboron de la laborgrupo pri financoj. La celo estas certigi glatan funkciadon de UEA je siaj kernaj agad- kaj funkci-kampoj.

Kion konkrete vi volas fari pri la financa situacio kaj la Centra Oficejo?

– En la lastaj jaroj kelkaj timis, ke UEA mortos pro malapero de la membroj, sed riĉa, kun abunda kapitalo. Nun iuj timas, ke la financaj deficitoj akcelos la kolapson de UEA. La defio estas do granda kaj grava. Necesas racie, senpasie analizi la kontojn. Serĉi vojojn por ekvilibrigi la kurantajn el- kaj enspezojn. Ĉiuj vojoj estu esplorataj. Mi fidas ke la laborgrupo pri financoj atenteme kaj energie cerbumos kaj proponos realigeblajn ideojn.

– La solvoj ne estas evidentaj, alikaze ni estus jam trovintaj kaj efektivigintaj ilin. Sed la situacio ankaŭ ne estas senespera. Kiel montris la futbala teamo de TEFA en Seulo, venki eblas. La UK 2018 estos lisbona, ankaŭ por la kasoj, la UK 2019 finnvenka. Intertempe konsolon ni trovu en la proverbo “La dorm’ estas bona, se mankas la mono”…

Nikolaj Incertov estis unu el la esperantistoj, kiuj pereis dum la Stalinaj persekutoj. Fine de januaro, kadre de projekto kiu celas eternigi la memoron de la viktimoj, sur la muro de lia lasta loĝdomo en Moskvo estis fiksita memortabulo. Nun rusiaj esperantistoj intencas serĉi la lastajn adresojn de pliaj persekutitoj, rakontas Nikolao Gudskov. 

La granda teroro de Stalino – la pinto de politikaj reprezalioj en Sovetunio en 1937–38 – lasis en la socio de ĉiuj sovetiaj popoloj grandan vundon, kies cikatroj doloras ĝis nun.

Grandan signifon ĝi havis por la Esperanto-movado en la lando. La plejparto de la ĉefaj movadaj gvidantoj kaj aktivuloj estis aŭ mortpafitaj, aŭ kondamnitaj al longaj jaroj en koncentrejoj, de kiuj ne multaj revenis.

La projekto “La lasta adreso” estas civitana iniciato, celanta al la eternigo de la memoro pri la politikaj reprezaliitoj. Memore al la viktimo sur la muro de domo, kie loĝis reprezaliito, oni instalas malgrandan ŝildon, dediĉitan al unu homo. La principo de la projekto estas “Unu nomo, unu vivo, unu signo”.

La projekton efektivigas la Fondaĵo por la eternigo de la memoro de viktimoj de politikaj reprezalioj “La lasta adreso”, laŭ informoj el datumbazo de la societo “Memorialo”. La laboro estas pli energia tie, kie troviĝas aktivaj kaj kompetentaj homoj, pri tio okupiĝantaj. Tiaj aktivuloj troviĝis en la moskva distrikto Ŝabolovskij, kie ili malkovris la loĝadresojn de ĉiuj viktimoj el sia distrikto, kio postulis grandan laboron en arkivoj kaj organizajn fortojn.

Ekde 1937 ĝis 1939 el la domo 11 laŭ Ĥavsko-Ŝabolovska strateto la sovetia sekreta polico OGPU-NKVD arestis 24 homojn; ĉiuj estis mortpafitaj. (Temas pri 15 domoj de la kvartalo kun la sama numero – eksperimenta konstruaĵaro en konstruktivisma stilo de arkitekto Nikolaj Travin). Estis tajloro, kinofilmisto, kuracisto-epidemiologo, aktoro, tekstokorektisto, direktoro de fabriko, senlaborulo… Inter ili estis nenio komuna, krom la loĝloko.

Kaj unu el ili estis eminenta esperantisto, unu el la gvidantoj de Sovetrespublikara Esperantista Unio, SEU, dum longaj jaroj ties respondeca sekretario, Nikolaj Jakovleviĉ Incertov (1896-1937). La aktivulino de la distrikto Inna Drobinskaja, esplorante la aferon, precizigis la adreson kaj turnis sin por pliaj donitaĵoj al Rusia Esperantista Unio, REU, por finaranĝi la aferon. De esperantistoj oni ricevis certajn informojn, tradukojn al la rusa de kelkaj materialoj kaj ĝeneralajn skizojn pri la reprezalioj kontraŭ esperantistoj, kaj kelkajn malnovajn eldonaĵojn por ekspono.

Antaŭ la komenco de instalado de la memorŝildoj en la 31-an de oktobro (tago de politikaj prizonuloj en Rusio) okaze de 80-jariĝo de granda teroro, en la municipa muzeo Galerio sur Ŝabolovka/Muzeo de avangardo, troviĝanta ĝuste en tiu kvartalo, malfermiĝis ekspozicio, dediĉita al viktimoj de politikaj reprezalioj. Ĝi rakontas pri 5 el tiuj 24 mortigitoj, kiuj loĝis en la kvartalo – ĉiuj 15 domoj havis iam la saman numeron – 11 Ĥavsko-Ŝabolovska strateto.

Dum la malfermo de la ekspozicio ĉeestis Nikolao Gudskov kaj Valentin Seguru, Gudskov elpaŝis pri Incertov kaj la persekutoj kontraŭ esperantistoj.

La ceremonion partoprenis la iniciatintoj de la instalo de la ŝildo, aktivuloj de la societo Memorial, esperantistoj (interalie la prezidanto de REU Svetlana Smetanina) kaj eĉ nepo kaj pranepo de Nikolaj Incertov, kiuj hazarde eksciis pri la afero pere de la interreto. Sonis paroloj pri Incertov, aliaj mortigitoj dum la Granda Teroro, de esperantistoj kaj neesperantistoj. Poste oni instalis ankoraŭ unu memorŝildon sur najbara konstruaĵo, pri la latva aktoro Rūdolfs Bancāns.

Ni eksciis pri la projekto “La lasta adreso” tute hazarde, de la iniciatintoj de la distrikto Ŝabolovskij. Sed nun ni intencas daŭrigi tiun laboron, peni trovi lastajn adresojn de aliaj esperantisto pereintaj en tiuj teruraj jaroj, kaj fari memorŝildojn ankaŭ pri ili.

Nikolao Gudskov