Male ol kutime, ĉi-jare en la junia numero de la revuo Esperanto ne aperis la atendita raporto pri la sukcesoj de la nova estraro de UEA. Por kompreni kio okazis, Libera Folio esploris, kion fakte atingis la estraro dum sia unua oficojaro. Montriĝis, ke nur ses el la sume 65 konkretaj celoj starigitaj en la ĉi-jara laborplano estis realigitaj.

En la julia numero fine aperis mallonga versio de la estrara raporto, kun adreso de paĝo en la retejo de UEA, kie oni legu la plenan version. Sed de tiam pasis jam preskaŭ du semajnoj, kaj la plena teksto de la estrara raporto daŭre ne disponeblas. En la retejo de UEA aperas nur la “resumo”, kaj peto pri iom pli da pacienco.

Tio supozigas, ke la “resumo” aperinta en la julia revuo efektive “resumas” raporton, kiu ankoraŭ ne ekzistas. La perdita raporto inspiris du junajn iranajn esperantistojn, Mina kaj Omid Rohanian, krei la karikaturon, kiun ni nun publikigas.

– Laŭ mi, komiksoj kiuj enhavas kritikojn aŭ demandojn povus unue allogi pli multe da homoj al esperantaj publikaĵoj kaj due, ili povus krei helpeman dialogon en esperantujo. Ĉiu komunumo bezonas kritikeman enrigardon por sana evoluado. Arto povas esti bonega ilo por tiu celo kaj kiel oni diras, “unu bildo egalas al mil vortoj”, klarigas Omid Rohanian.

Li estas esperantisto de tri jaroj, kaj elpensis la ideon kaj tekston de la bildstrio, dum lia fratino Mina Rohanian, kiu estas profesia grafika fasonisto, faris la desegnadon. Ankaŭ ŝi lastatempe ekinteresiĝis pri Esperanto, kaj la duopo planas estonte proponi pliajn laŭtemajn karikaturojn aŭ bildstriojn por publikigo en Libera Folio.

La 6-an de julio aperis la 100-a novaĵo de pprojekto StopFake Ukrainio, funkcianta ekde la 7-a de marto. Temas pri la esperanto-versio de la samnoma projekto fare de ukrainiaj ĵurnalistoj, kadre de kiu estas senmaskigataj propagandismaj mensogoj de ambaŭ flankoj – ĉu rusia, ukrainiaŭ aŭ tiu de porrusiaj batalantoj. La esperanto-versio estis lanĉita laŭ interkonsento kun la ukrainia teamo kaj plu funkcias danke al volontula laboro de la rusia-ukrainia teamo de tradukistoj kaj publikigantoj.

Oni povas sekvi StopFake Ukrainio ĉe Fejsbuko, Ipernitio kaj Tvitero.