Monthly Archives: August 2012

2012-07-3/3

DE NORD-EST-EUROPA E CENTRAL AZIA
2012-07-21: La prezidantulo Rusiana Vladimir Putin signatis lego federal yurizanta junto di Rusia al Organizuro Mondal di Komerco.
DE WEST-EUROPA E KANADA
2012-07-23: La Hamburg-Köln-Express — tale nomesas kompanio konkurencanta la Deutsche Bahn dominacanta la merkato — komencis funcionar en la treno-voyo inter Hamburg, nord-Germania, e Köln, Nordrheno-Vestfalia, west-Germania.
DE USA
2012-07-23: Sally Ride, l’ unesma astronautino Usana, mortis pro kancero di pankreato evante sisadekeun yari.
DE EST-AZIA
2012-07-25: Komitato Sud-Koreana privata anuncis procesor kontre Nord-Korea koram la Korto Punisal Internaciona por ri-patriizo di kaptiti milital e restaji di soldati ocidita dum la milito Koreana.
DE SUD-WEST-AZIA
2012-07-26: La jurnalo por-guverneria Siriana Al-Watan nomis batalio preparata en Halab, nord-Siria, “la matro di omna batalii”.
DE *CHINA
2012-07-26: Autoritatozi di Beijing blamesis, mem da informili statal, pro morto di cirkum okadek homi dum inundo e sturmo.
DE SUD-EUROPA ED AFRIKA
2012-07-26: La prezidantulo dil Ivora Rivo Alassane Ouattara renkontris sua samranganulo Franciana François Hollande en Paris por konkluzar pakto pardononta preske 4.7*109 dolari debata dal Ivora Rivo a Francia.
NOVAJI INTERNACIONA
2012-07-23/29: Ido-konfero eventis en Dessau, Saxonia-Anhalt, est-Germania.
2012-07-27: Malgre instigo dal sekretariulo general di la Nacioni Unioninta Ban Ki-moon, nula konkordo global atingesis pri regulizo di komerco ye armi.
2012-07-27: La triadekesma ludi Olimpial someral ceremonie apertesis en London da Sua Majesto Elizabeth 2ma kom rejino dil Rejio Unionita. El, kom rejino di Kanada, facabis to ja antee en Montréal, Quebek, est-Kanada, en la yaro 1976.
2012-07-25/29: Renkontro *Nordika di Interlingua eventis en Tjörn, west-Suedia.
2012-07-29: Nova inquesto publikigita en la jurnalo Nature Geoscience detaloze deskriptis mekanismo, per qua karbo tiresas del surfaco dil Oceano Antarktika ad aquo plu profunda.
2012-07-30: Pezo-levistulo Nord-Koreana Kim Un-Guk facis nova rekordo mondal, ganante medalio orea.
2012-07-31: Natistulo Usana Michael Phelps ganis rekorda dekenonesma medalio Olimpial – orea en la relayo-konkurso ye quar per duacent metri per libera maniero.
2012-07/08-28/04: Universala kongreso di Esperanto eventis en Hà Nội (Esperante Hanojo).
DE AMERIKA LATINA ED OCEANIA
2012-07-30: La prezidantino Braziliana Dilma Rousseff kun-vokis komisitaro di vereso por inquestar la diktatoreso milital Braziliana.
SONO
https://www.box.com/s/b2dbb475f774e13282c7
ACHENTO
Slovaka
SUB-MUZIKO
Uverturo di “Vivo por la Caro” da Mikhail Glinka (Rusia)

MIKRA EPIZODI EK LA HISTORIO DI IDO

Louis Couturat
 [Samideano Gonçalo Neves informis ni che "Facebook" ed altra Idala forumi]
 
Ye la 3-ma di agosto 1914, precize 98 yari ante la nuna dio, mortis Louis Couturat, precipua autoro di la Linguo Internaciona Ido. Pos vizitir kuzulo en Paris, il retrovenis a sua habiteyo en Bois-le-Roi duktante sua automobilo, en qua vehis anke lua spozino e lua kuzino, spozo dil vizitito. Sur la voyo de Ris-Orangis a Melun lua automobilo shokis granda militala veturo rapidege duktata da soldati qui portis mobilizimperi pro la unesma mondmilito quik komenconta. La shoko esis violentala: lua kuzino lansesis ek la automobilo, srino Couturat recevis vundi e kontuzi, ma Couturat ipsa, lore evanta nur 46 yari, subisis plu mala fortuno: lua pektoro aplastesis, ed il transvivis nur dum kelka instanti. On apene povas imaginar quante il sufris dum ta kurta instanti…

E tale la Ido-movado perdis sua mentoro e precipua agero. Multa idisti saveskis la funesta evento erste multa monati pose. La agostala numero di Progreso, quan Couturat zeloze redaktabis e preparabis en julio – la lasta numero dil unesma serio – aparis erste en agosto 1920. En Europo flagris homivora milito. Couturat, senfatiga pacifisto, ne asistis olua kruelaji. Lua violentala morto sparis ad il tala ditreso…