Category Archives: Pontilingua

Un libro de notas sur linguas de ponte

La taxe difisil de clasi linguas desiniada

Interlinguistica per esperantistes
(numero 2 de 10 articles)
Fonte: Federico Gobbo, revista Esperanto, julio–agosto 2014

On conose a la min tre maneras de categori linguas desiniada.

Louis Couturat ia deveni interesada sur interlinguas pos studia alga obras nepublicida par Leibniz sur lojica. Con Léopold Leau, el ia prepara un libro sur la istoria de tal linguas (publicida en 1903) per convinse otra persones inteletosa ce la idea ave bon radises en la istoria de siensa. Esta libro ia divide la linguas en tre categorias:
apriori, de cual cuasi tota ia es creada par filosofistes, e multe ia es pasigrafias o cosas simil como solresol;
aposteriori, construida sur un funda de linguas ja esistente, e sempre plu la foca de la interlinguistica moderna;
miscada, como volapük.

En un libro de 1985, Detlev Blanke ia presenta 19 grados sosiolinguistical cual un lingua desiniada pote ateni. La grado prima es la publici inisial e defininte. La grados seguente pertine a la crese de un rete de usores, con revistas, leteras, asosias, leteratur fundal, e libros de aprende. La grado 9 es la parla de fas a fas, e 13 es la suporta publica per ensenia la lingua en scolas. Pos acel, cualias de cultur interna apare, como la verbo esperanto krokodili, cual sinifia “parla se lingua propre en un situa esperantiste”. Un lingua ariva a la grado 19 cuando familias parla lo; sola esperanto ia ateni esta.

En 2009, Federico Gobbo ia developa un idea publicida en 1970 e 1974 par Alessandro Bausani. On pote loca cada lingua desiniada sur un graf de du dimensiones: un ase vertical de aida e un orizonal de publicia. Linguas nonaidante es xef usada en naras. Linguas privata inclui la personales e la rituales, e ance los creada par Tolkien per se naras. La lingua comica Europanto (cual ave no regulas) es en la cuadrante secreta nonaidante, ma prosima a la du ases. Volapük ia comensa en la cuadrante publica aidante (como tota otra interlinguas), ma ia move a publica nonaidante (do on trova ance klingon e na’vi) pos se apare en alga naras resente. La cuadrante secreta aidante es vacua.

Otto Jespersen

Fonte: Federico Gobbo, revista Esperanto, junio 2014

 
Otto Jespersen ia nase en Danmarc en 1860, e ia gradua pos studia la lingua franses en 1887. El ia es interesada par metodos de instrui linguas stranjer, spesial la pronunsia, e ia contribui a la crea de la Alfabeta Fonetical Internasional. Se obra xef es Modern English Grammar en sete volumes.

El ia labora multe sur linguas aidante internasional, rejetante volapük e ultima criticante esperanto per se manca de prinsipes per crea parolas, se leteras con sinietas, la orijin slavica de alga de se parolas, e la aprioria de se parolas tablida.

Pos la mori de Louis Couturat en 1914, Jespersen ia scrive multe testos linguistical en ido, e en 1925, el ia partisipa en la labora de IALA sur Interlingua.

En 1928 el ia publici se lingua propre, nomida Novial. Lo no ia deveni popular, e Tolkien ia opina ce lo es estetical fea.

El ia continua promove interlinguistica asta la Gera Mundal Du, e ia mori en 1943.

Interlinguistica: un parola, multe sinifias

Interlinguistica per esperantistes
(numero 1 de 10 articles)
Fonte: Federico Gobbo, revista Esperanto, junio 2014

On ia inventa interlinguistica en 1911 [ma la autor no esplica plu].

En 1931, a un confere linguistical en Geneve, Otto Jespersen ia presenta lo como un sucampo nova de linguistica, cual va studia la similes entre linguas per trova un interlingua – cual otras ia prefere nomi un lingua internasional aidante. Oji, on refere plu comun a linguas desiniada (planlingvoj en esperanto).

Ta ce on evita la espresas “lingua artifisial” e “lingua construida”, car los descrive plu bon linguas formal de programi o matematica. Par contrasta, linguas umana ave du niveles de sinia: morfemes e fonemes. La siensa de sistemes de sinia es nomida semiotica.

La parola “interlingua” ave otra sinifias:

— En 1903, Giuseppe Peano ia publici un lingua Latino sine Flexione cual el ia nomi ance Interlingua. El ia emprende en 1908 un Academia pro Interlingua cual ia suporta Volapük e Idiom Neutral a ante.

Interlingua ia es ance la nom de un otra lingua aidante, publicida en 1951 par la asosia IALA de cual se nucleo ia es Alice Vanderbilt Morris.

— En lingustica informatical, e spesial en sistemes cual tradui testos umana, un interlingua es un lingua media (e formal) a cual on tradui inisial la testo de fonte. La sistem Tradui Lingual Distribuida ia usa esperanto como un tal interlingua en la desenio de 1980.

— Pos un article major par la linguiste Larry Selinker en 1972, “interlingua” refere ance a un varia erosa de un lingua stranjer parlada par un person ci aprende ancora lo. Enfantes ci aprende se lingua propre mostra un fenomeno simil, an en esperanto.

Esperantolojia (la siensa de esperanto) es un parte major de interlinguistica, car esperanto es la interlingua la plu vasta usada. Esta serie de articles apare a sento anios pos cuando René de Saussure ia fundi esperantolojia con se teoria sur la crea de parolas esperanto.